Joh 14 | NdeIBE | STEP | “Izinhliziyo zenu kazingakhathazeki. Thembani kuNkulunkulu; thembani njalo kimi.

John 14

UJesu Ududuza Abafundi Bakhe

1 “Izinhliziyo zenu kazingakhathazeki. Thembani kuNkulunkulu; thembani njalo kimi.

2 Emzini kaBaba kulezindlu ezinengi; aluba kungenjalo ngabe ngalitshela. Ngiya khona ukuyalilungisela indawo. 3 Njalo nxa sengiyile ukulilungisela indawo ngizabuya ngizolithatha ukuthi libe lami, ukuze lani libe khona lapho engikhona. 4 Liyayazi indlela eya lapho engiya khona.”

UJesu Yindlela Eya KuBaba

5 UTomasi wathi kuye, “Nkosi, kasikwazi lapho oya khona, pho singayazi kanjani indlela na?”

6 UJesu waphendula wathi, “Mina ngiyiyo indlela – njalo ngiliqiniso lokuphila. Kakho ozayo kuBaba ngaphandle kwami. 7 Aluba belingazi mina ngempela, belizamazi loBaba. Kusukela khathesi, selimazi njalo selimbonile.”

8 UFiliphu wathi, “Nkosi, sitshengise uBaba ngoba lokho kuzasanelisa.”

9 UJesu waphendula wathi, “Awungazi na, Filiphu, lokuba bengilani isikhathi eside kangaka? Lowo ongibonileyo usembonile uBaba. Ungatsho kanjani ukuthi, ‘Sitshengise uBaba’?

10 Kawukholwa yini ukuthi ngikuBaba, lokuthi uBaba ukimi? Amazwi engiwakhulumayo kini akusiwo nje awami. Kodwa kunguBaba ophila kimi owenzayo umsebenzi wakhe. 11 Kholwani kimi uma ngisithi ngikuBaba loBaba ukimi; loba kodwa lokhu kholwani ngenxa yobufakazi bemimangaliso ngokwayo. 12 Ngiqinisile ukuthi lowo okholwayo kimi uzakwenza lokho ebengikade ngikwenza. Uzakwenza izinto ezinkulu kulalezi ngokuba ngiya kuBaba. 13 Njalo ngizakwenza noma yini eliyicelayo ngebizo lami, ukuze iNdodana ilethe inkazimulo kuBaba.

14 Lingangicela noma yini ngebizo lami, ngizayenza. 15 Uma lingithanda lizakwenza lokho engiliyala khona.

UJesu Uthembisa UMoya ONgcwele

16 Ngizacela kuBaba ukuthi alinike omunye uMeluleki, 17 uMoya weqiniso, ukuba abe lani lanini. Ilizwe ngeke limamukele uMeluleki lo ngokuba kalimboni njalo kalimazi. Kodwa lina liyamazi ngokuba uhlala lani njalo uzaba lani.

18 Kangisoze ngilitshiye liyizintandane, ngizabuya kini. 19 Kakusekhatshana ukuthi umhlaba ungabe usangibona njalo, kodwa lina lizangibona. Ngenxa yokuthi ngiyaphila yikho lani lizaphila.

20 Ngalolosuku lizakunanzelela ukuthi ngikuBaba, lina likimi, lami ngikini. 21 Lowo olayo imilayo yami, ayilalele, nguye ongithandayo. Lowo ongithandayo uzathandwa nguBaba, njalo lami ngizamthanda ngiziveze kuye.”

22 Ngakho uJudasi (hatshi uJudasi Isikariyothi) wathi, “Kodwa, Nkosi, kungani ujonge ukuziveza kithi, hatshi emhlabeni na?”

23 UJesu waphendula wathi, “Nxa ekhona ongithandayo uzalalela imfundiso yami. UBaba uzamthanda, njalo sizakuza kuye sakhe umuzi wethu kanye laye. 24 Lowo ongangithandiyo kayikulalela imfundiso yami. Amazwi la eliwezwayo kawasiwami; angakaBaba ongithumileyo.

25 “Konke lokhu ngikukhulumile ngiseselani.

26 Kodwa uMeluleki, uMoya ONgcwele, uBaba azamthumela ebizweni lami, uzalifundisa zonke izinto njalo uzalikhumbuza konke engikukhulumileyo kini. 27 Ukuthula ngikutshiya kini; ukuthula kwami ngilinika khona. Kangiliniki njengokunika komhlaba. Lingakhathazeki ezinhliziyweni zenu njalo lingesabi.

28 “Langizwa ngisithi, ‘Ngiyahamba njalo ngizabuya kini.’ Uba belingithanda, ngabe liyathokoza ukuthi ngiya kuBaba, ngoba uBaba mkhulu kulami. 29 Sengilitshelile manje kungakenzeki, ukuze kuthi nxa sekusenzakala lizakholwa.

30 Kangisayikukhuluma lani okwesikhathi esinganani, ngokuba inkosi yalo umhlaba isisiza. Kayilamandla phezu kwami, 31 kodwa umhlaba umele wazi ukuthi ngiyamthanda uBaba lokuthi ngenza khona kanye uBaba angilaye khona. Wozani manje; kasisukeni lapha.